THUMAKAAI:

THUMAKAAI:

Hiche chunggam mite kiti lekhabuhi semdohtei nadinga kanalungtup nahi kahinkho phat asaojo kanaman ahitan,hicheho jouse abaanbanna kahinsut lutnahi kumli lhingset kasulutkit nalaije.Chule asunga thu kisunlut jouse jonghi asimjouse dinga pomdet mong mongthei ahinadingin kenjong nasatah in kangaitoi.Thu kaholna thuahin dohdinga phahojong kadong thounan ahinla keimudollin tukhang miho lah avang deitheitah thu imacha akimu joutapoi.Hinla keima insungahin nampi khangthudol tampi kana hetsa ana umin kapu kapatehochu  thempu anahiuvin chule khangthu hethem tahcheh anahiuvin hichehochu thugille thului ho kahinhol phatnin akehkhat langpi ahungdih e.Keiman kahetnom dungjuijin lekhabujong vet theichan kaven leiset hinkho thului holgilho thilmu apat Bible la semtillapat paocheh chule mihemte hung kithekhen,achii le anam dungjuija ahung chennaoho kahollin ihinao kichehtah mudoh theinadingin.Thuhi atamjo tabanghi leisetnin thil avuhkhum bangin aumgamtan ihinaojong tampi iki suhmilgam taove. Hiche kalungtup saanga hoijon Pathen panpi najaalin kicheh tah in kamujoi.Kana gellachun eihohi ibullangu kiholdohleh jachat umtahte khattou anakihidem kanatei. Hinla namluitah, chonna bukimsa neite,chubanna koimacha thaneina noijajong umkhalou chubankitna koimacha lah ajong lutna mangjong mang khaloute, gaalhattetah,inahiojoh kamudoh in milah a gamanthah malah in eiho mite joh hi namdang lahsunga gamangthah katam mudoh lheh e. Chunggammite hi map jong akivetsah thouvin Babel paocheh khanga paokhatna kihoutheilou jousechu anakivoplou,akihouthei hobou anakivop,anakiloijeng  ahikhangachu chunggam mitehi loikhatchu inahiu ahitai.

Hinla kumle khang ahungsotle agampoh jaalin tujeng jonghin insungkhat te akihivangin pao kibanglou akitamtai.Hiche lekhabu thudollahin kageldanto abahlevang chunggam insungmite in eikipapi lhehjeng diuvin katahsanne.Chule lekhabu thudol monga jonghin thujousehi ngailut tumle demtum neilouhella thujousehi anahina bangtah a sodoh dinghi ahi.Abanna kagelkit khatchu asunga kisun thuhohi ibonchaova ingaichat cheh lampio hidinga kageljeh a tawmngai tahle gunchutah akahinbol ahi. Achainan ipichu kiboljongle chamkimkei jintevang kati ngampoi.Alhahsamna jouse chunga ithah pankhom kitnuva ahoibecheh nadinga kigocheh jodingin asimjouse hengah panpina kangeh e Lolhintheina dinga Pathenin aphat dungjuija panpina eipehjing kamun Pathen thahat jallin jotheijin ahung umin Pathen kathangvah lhehjengin akalvallin jong asimjouse dingin phatthei eibohpeh kit teiteijuhen.                                                                                          

                                                                                                                  

Dated Suongjang Pakang
The Fifteenth of March 2004

Author:

Thangkholet Kipgen

Suongjaang Pakaang Village

Sadar Hills. Manipur.